Rafael Rodríguez Valdés fala sobre “Erada” nel diariu “El Comercio”

La revista d’historia contemporánea d’Asturies, Erada, llega’l so tercer númberu con cambiu d’editorial, pasando a espublizase por Suburbia. Una publicación dirixía por ún de los hestoriadores más mozos del Principáu, Rafael Rodríguez Valdés (Uviéu, 1978). Miembru fundador y presidente del Conceyu de Xóvenes Hestoriadores, participó na organización de delles ediciones de les Xornaes d’Hestoria Contemporánea. Espublizó ensayos en delles revistes y ganó la primer edición del concursu d’investigación Fierro-Botas col ensayu ‘Discursos llingüísticos y movimientu obreru na Asturies decimonónica’.

–¿Qué conteníos atopamos nesti nuevu númberu?

–Presentamos un monográficu que tien como filu de común l’estudiu en momentos distintos de la historia contemporánea d’Asturies de los diversos fenómenos políticos qu’ente más otros entendieron Asturies como suxetu políticu; ello ye, l’autonomismu, el rexonalismu y el nacionalismu. Asina les coses, Faustino Zapico fálanos d’una campaña pola autonomía desarrollada pol republicanismu federal a finales del sieglu XIX; Cristóbal Ruitiña afonda nos empiezos de la revista Asturias Semanal; Armando Magadán analiza la evolución y los postulaos ideolóxicos del Partíu Asturianista; y l’historiador estaunidense Patrick Zimmerman ofrez les premises que va desenvolver na tesis doctoral del nacionalismu asturianu que va lleer esti añu. Y p’acabar, tamién s’inclúi l’habitual sección de reseñes de trabayos historiográficos.

–¿Cómo surdió la idea de publicar la revista?

–De mano, porque nun había equí una revista dedicada n’esclusiva al estudiu y divulgación de la historia contemporánea d’Asturies. Pero, d’otra banda, lo que sí había y hai ye una serie d’investigadores autóctonos que, amás de competentes, dediquen los sos esfuerzos y el so valir a investigar y estudiar la nuestra historia.

–Cambiu d’editorial y tamién de formatu, ¿en qué se nota?

–Eso ye un aspectu a valorar polos llectores; sicasí, abúltame que no tocante al interior mandámonos de los presuestos colos qu’entamemos: la combinación del rigor cola divulgación y la nuestra atención fixada n’Asturies.

–¿Tán contentos col resultáu depués de tres númberos?

–Trés númberos son pocos dientro de lo qu’esperamos sía una trayectoria muncho más llarga y pel momentu más que de facer balances, planteámonos que la revista siga esistiendo, que meyore númberu ente númberu y que cada vuelta sía más lleída polos asturianos.

–Ún de los temes ye’l del nacionalismu asturianu, ¿tamos ante un conceptu claru y definíu?

–Historiográficamente’l nacionalismu ye un fenómenu claru bastante como pa nun lu tracamundiar con otros; pero d’otra manera nun ye un conceptu unívocu, ello ye, nun habría que falar en singular sinon en plural, nacionalismos. Inclusive pal casu asturianu y a pesar de les nuestres zunes.

–¿Hai tovía ciertos prexuicios sobre la falta de dinamismu de la historia, de trabayar con conceutos y situaciones fixes?

–Imaxino qu’igual que n’otros casos d’individuos con prexuicios, lo meyor p’abandonalos ye tener voluntá d’acabar con ellos, facer por abrir la mente y por francer les barreres de la inorancia. Nesi sentíu, sí, lo meyor ye lleer la revista directamente antes d’echar la llingua a pacer.

–¿Estudiar la llingua asturiana históricamente ayuda a comprender el presente y a tratar de meyorar la so situación?

–Respecto de la primer parte de la pregunta, la respuesta nun pue ser otra qu’un sí claru y directu. Con éses, la llectura d’un llibru como La formación histórica de la llingua asturiana del profesor de la Universidá d’Uviéu Xulio Viejo Fernández faise obligada pa les persones que quieran conocer el procesu de tresformación del llatín no que conocemos como asturiano na nuestra tierra. No tocante a la segunda parte, conocer los procesos alredor de la llingua asturiana ayuden, claro; pero pa que nun futuru esistan falantes d’asturiano, amás d’un programa de midíes polítiques y educatives acionaes, necesítase pencima y más que nunca del compromisu activu y diariu de los falantes y neofalantes del idioma, pa que lu usen en cualesquier ámbitu de les sos vides mesmo qu’a la de tresmitilu a les persones más cercanes.

–¿Qué planes de futuru tienen pa la revista?

–Facer los posibles porque siga esistiendo.

–¿Tá trabayando dalgún trabayu nuevu?

–Dos testos: unu sobre M. Foucault y l’otru sobre l’abogacía antifranquista.

Fonte: El Comercio

Semeyes: “Intentu d’escritura” y “Erada”

Semeyes de les presentaciones d’ Erada y d’Intentu d’escritura na Fnac. Na primera, Faustino Zapico, Armando Magadán, Cristóbal Ruitiña y Rafael Rodríguez Valdés. Na segunda, Silvia Cosio, Armando Magadán, Cristóbal Ruitiña y Rafael Rodríguez Valdés. Na tercera, Silvia Cosio, Xurde Fernández y David Fernández.

Y un mensaxe d’aliendu pa Faustino Zapico, nestos momentos difíciles.

Presentóse “Erada” en La Felguera

“Erada”: imáxenes de la presentación

“Erada”: presentación oficial del tercer númberu

Paula Pulgar entrevista a Rafael Rodríguez Valdés en “Oviedo Diario”

Rafael, ta recién apaecíu’l tercer númberu de la revista Erada. ¿Pues cuntanos qué se pue topar nesta edición?

Nesta nueva entrega de la revista los llectores van topar un nexu de común ente los sos conteníos, que ye l’estudiu d’aspectos de fenómenos políticos como son l’autonomismu, el rexonalismu y el nacionalismu asturianu na Asturies de los sieglos XIX y XX. No que fai a los conteníos hai artículos tocántenes una campaña autonomista entamada polos republicanos federales nel 1897, los empiezos de la revista Asturias Semanal y la trayectoria y evolución ideolóxica del Partíu Asturianista, a lo qu’hai qu’añader la nota del historiador estaunidense Patrick Zimmerman onde ésti esplica’l so proyectu de tesis doctoral del nacionalismu asturianu. Y igual qu’en tolos númberos anteriores tamién hai un apartáu de reseñes de llibros.

 L’apaición d’esti tercer númberu supón un cambiu d’editorial y de formatu, ¿por qué esi cambiu? ¿Qué supón la novedá?

Independientemente del bon trabayu desarrolláu polos trabayadores d’Ediciones Trabe (encargada de publicar los dos primeros númberos de la revista), dalgo que reconozo a les clares y que quiero sorrayar pa que nun haya dulda nenguna al respective, la desconfianza y les rocees xeneraes pol dueñu de la empresa no que me toca, yá que yo soi’l director de la revista, nun facíen posible siguir con Ediciones Trabe. Nun quiero afondar pel momentu nello yá que ye’l tipu de cuestión que namás esmolez al públicu asturianista. Pero la llibertá de cátedra ye una de les señes d’identidá d’Erada y si’l propiu director nun tien garantíes nesi sentíu, yera bien difícil dar eses garantíes a los collaboradores presentes y futuros de la publicación, dalgo que ye conditio sine qua non.

El pasar a Suburbia Ediciones implicó cambios nel diseñu y tipografía de la revista, pero non na política de publicación de conteníos de la que yo soi enteramente responsable, y que caltién continuidá respecto de los empiezos d’Erada. Tamién aprovecho pa conseñar l’apoyu de Suburbia pa cola revista.

Erada ye ensin duda una rara avis dientro del panorama editorial asturianu, ¿a qué crees que se debe eso?

Esta ye una pregunta difícil de responder, de mano porque ye posible que nun tenga tolos datos al respective. Por casu, munches de les revistes d’historia contemporánea esistentes surden nos departamentos de les universidaes ¿por qué nun foi asina equí?

Quiciabes hailu qu’argumente qu’hai revistes de ciencies sociales o de temática asturiana que faen innecesario una publicación específica d’investigaciones d’Historia Contemporánea d’Asturies. Ye cierto qu’en revistes como Ástura, Asturies, Los Cuadernos del Norte o BIDEA publicáronse artículos d’eses característiques, pero en dalgunes d’elles hubo y hai censures ideolóxiques que, por un poner, nun permiten publicar n’asturianu o en gallego-asturianu, dalgo que sí permite Erada. A ello hai qu’añader que pue haber diferencies a la d’evaluar l’estáu de la cuestión tocántenes la entidá y dimensión de les investigaciones esistentes mesmo que del nivel y competencia de los investigadores asturianos, que na mio opinión sí faen necesario una publicación como Erada, anque namás fuere pola visibilización d’estos autores y de les sos investigaciones, qu’agora salen acullá de les muries universitaries y académiques y lleguen al públicu xeneral.

P’acabar, masque na revista haya testos en castellanu, asturianu o gallego-asturianu, si se mirara pa la edición n’asturianu, pa mio idea que lo de rara avis esplicaríase pol comportamientu diglósicu de determinaos autores mesmo que poles característiques sui generis del mercáu editorial asturianu y del propiu espaciu asturianista.

Esti númberu tien un nucleu temáticu marcáu. ¿Facía falta una revisión del nacionalismu asturianu?

Primero que nada, hai qu’indicar que dende la dirección de la revista nun hai puertes pesllaes pa nada, polo qu’a priori l’estudiu de cualesquier aspectu de la historia contemporánea d’Asturies tien sitiu nes sos páxines.

Depués, la historia d’Asturies hai que la investigar, hai que la estudiar, hai que la conocer y hai que la tresmitir. Nesi sentíu, una y buenes sía necesario, nun hai que poner pilancos a la revisión de los estudios fechos mesmo que tampoco nun hai que vetar la posibilidá d’estudiar otra vuelta determinaos temes.

Sía como quier, l’estudiu y nel casu que sía posible la revisión de fenómenos como l’autonomismu, el rexonalismu o’l nacionalismu na Asturies contemporánea, ye competencia de los investigadores; Erada namás ye un mediu de tresmisión de los sos trabayos.

Pa rematar la respuesta, na mio opinión el nacionalismu asturianu nun ta estudiáu bastante, pero eso nun ye motivu nengún pa nun echar una güeyada sobre lo fecho hasta agora.

¿Qué tien d’envidiar el nacionalismu asturianu en relación con otros nacionalismos dientro d’España? ¿Y col nacionalismu español?

Cuando col nacionalismu español, cuando con otros nacionalismos esistentes nel Reinu d’España, no tocante a lo historiográfico (pues namás falo nesos términos) hai qu’envidiar toa una actividá académica, investigadora, etc., que nun se da n’Asturies; refiérome a actividaes como seminarios o xornaes pero tamién no tocante a producción propio. De la mesma manera, apenes hai producción escrito tocántenes les manifestaciones y discursos del nacionalismu español esistente n’Asturies, que tien peculiaridaes bien significatives, o coles mesmes, no que fai a la invención de la tradición que se da na nuestra tierra.

¿Consideres qu’esisten diferencies ente’l conceptu de nacionalismu dientro de la tradición historiográfica y el conceptu de nacionalismu qu’usa la clase política?

De mano, hai qu’esclariar que’l conceptu de nacionalismu nun ye un conceptu unívocu; de fechu, hai bien d’historiadores que preferimos falar de nacionalismos, asina, en plural, por reflectar meyor la diversidá ideolóxica. Sía que non, a pesar de lo acabante conseñar, más que diferencies podemos falar d’un abilsu, yá que la clase política nun paez lleer estudios d’historia, quiciabes sí novela histórica, pero non teoría y práctica historiográfica.

Dacuando trátase más del maniqueísmu y oportunismu ideolóxico-partidista que toque, que de falta d’información. Un casu que pue esclariar abondo nesti sentíu: ye raro, y hasta choca y too, ver per escrito referencies al nacionalismu español, que ye’l nacionalismu hexemónicu n’Asturies y en gran parte del Reinu, y eso que políticos a esgaya enllenen la boca cola palabra nacionalismu. Nun ye casual.

¿Qué otros temes en relación cola historia contemporánea necesiten una revisión?

La mio premisa ye que nun hai investigaciones definitives; toi na cuenta qu’otro sedría creer na perfección y na infalibilidá dafechu y nun hai talo hasta onde yo sé y conozo.

Asina les coses, hai temes d’investigación que quiciabes ameriten más revisión qu’otros, masque ello sía dalgo opinable y suxetivo enforma. Lo que sí ta claro ye qu’hai procesos y períodos de l’Asturies contemporánea que tán por estudiar entá: dalgunos apaecen citaos de riba y otros que puedo citar son la dictadura primorriverista, el carlismu o’l caciquismu, ente más otros. La relación ye mui amplísima y igual qu’agora digo esos trés mañana podía dar otros enteramente distintos.

La revista tien al final una cita de Nikita Krushev, ¿de verdá los historiadores son xente peligroso?

Si ún pensara n’Asturies, cuido que de mano taría bien falar de les condiciones precaries que carecen los historiadores asturianos (n’especial los más mozos y los que trabayen fuera de la universidá), condiciones que tendrían que meyorase a nun tardar, yá que los estudios, si se busca solvencia y competencia, necesiten de tiempu y condiciones de trabayu dignes.

A éses, el colofón de la revista nun ye sinón una notina irónica y autocrítica, una llicencia mui pequeñísima del director de la revista. Si qu’así, tamién ye parte d’una constatación personal: los historiadores, una y buenes ufren un trabayu solvente, dan en ser xente incómodo, bien porque valten mitos, bien porque nun puen ser usaos por ideólogos mediocres y oportunistes. Hasta ehí llega la nuestra peligrosidá pel momentu.

Entrevista con Rafael Rodríguez Valdés

Asturnews entrevista a Rafael Rodríguez Valdés, director d’Erada, por mor de l’apaición del tercer númberu de la revista.

Ye ún de los hestoriadores mozos más activos. Yá na Facultá foi miembru fundador y presidente del Conceyu de Xóvenes Hestoriadores, participando entós na organización de distintes ediciones de les Xornaes d’Hestoria Contemporánea y na publicación de les actes respectives. Tien ensayos espardíos per revistes, el cartafueyu “Llingua Asturiana y Movimientu Obreru 1899-1937” qu’abrió un camín inesploráu, l’estudiu-prólogu pa la edición facsimilar de les “Fueyes Informatives de Conceyu Bable”, y “Discursos llingüísticos y movimientu obreru na Asturies decimonónica”, col que l’añu pasáu ganó la primer edición del premiu d’investigación Fierro-Botas.

Amás, formó parte en xunto con Rubén Vega y Xulio Viejo, del comité organizador del Seminariu “Llingua, clase y sociedá”, responsabilizándose xunto a ellos de les actes. Sicasí, el llabor pol que ye más conocíu ye’l de dirixir la revista d’Erada, d’hestoria contemporánea d’Asturies, que con editorial nueva, Suburbia, llega al so tercer númberu. Valdés fálanos de les novedaes d’esta edición y d’otres cuestiones venceyaes al so trabayu como hestoriador.

-Númberu nuevu, y van trés, nesti casu temáticu, ¿yera necesario facer un analís más científicu del asturianismu políticu?

-Esti númberu d’Erada ta marcáu por un filu que ye l’estudiu hestoriográficu de fenómenos como l’autonomismu, el rexonalismu o’l nacionalismu na Asturies contemporánea; too ello al cargu d’investigadores que lleven años desarrollando trabayos al respective, polo que, sensu estricto, la necesidá (por usar los sos términos) yera anterior a la esistencia mesma de la revista. Sía como quier, esti tipu d’investigaciones son por elles mesmes merecedores d’espaciu nes páxines de la revista, dalgo que yá se diera nos dos primeros númberos (namás hai que remembrar les contribuciones de Faustino Zapico y de Xosé Miguel Suárez) y lo que tien de distinto esti númberu ye esi carácter monográficu qu’implica la visibilización, acullá del ámbitu académicu más restrinxíu, de que dalgunos historiadores asturianos tienen estes cuestiones como oxetu d’estudiu, dalgo que nun tien que caer embaxo yá que determinaes personalidaes polítiques y académiques fixeron por minimizalo a más nun poder.

-Nos trabayos yá espublizaos alredor del nacionalismu asturianu, ¿faltaba un analís más fondu de la cuestión?

-De mano, quiero indicar que voi referime n’esclusiva a trabayos historiográficos en ficies de que naide nun se tracamundie. Ello ye que queden fuera de la mio respuesta determinaos testos ahistóricos (o pseudohistóricos siendo mui mui arrogante), a pesar de que dalgún de los sos autores ponga la palabra historia nel títulu o nes solapes de les sos obres.

Entós, polo que fai a los trabayos historiográficos publicaos enteramente o de manera parcial, hai que sorrayar la diversidá de cuestiones trataes, la distinta entidá de les publicaciones, etc., como pa dar agora equí una respuesta que nun sía una xeneralización o una obviedá del tipu “nun hai investigaciones definitives”. Nun toi escapando de la so pregunta: nun hai una síntesis de conxuntu, falten estudios de fenómenos concretos, queda por recuperar bien de material y quiciabes sía tiempu d’entamar un foru que punxera estes cuestiones enriba la mesa. Sía como quier, nos últimos años recuperóse documentación y hai delles tesis doctorales en procesu de realización, lo que tampoco nun quita pa indicar que sí, nesta talo qu’en tantes de cuestiones más, necesítense estudios más fondos pero tamién, a cencielles, más análisis y otru tipu d’análisis.

-¿Conocemos con fondura abondo la hestoria del asturianismu o queda muncho por afayar?

-Si dalguién caltién que se conoz fondamente yo pensaría que bien ye un casu d’inorancia descomanada, bien ye un casu de mala fe. Hai muncho por estudiar y hai abondo por alcontrar. Namás una retafila datos pa la xente incrédulo: nos últimos años investigadores y públicu en xeneral tuviemos oportunidá, y foi la primer vez, de disponer d’ediciones facsimilares y crítiques de documentos tan importantes pa la historia del asturianisjmu como’l selmanariu El Regionalista Astur, el quincenal El Aldeano, les páxines de Conceyu Bable n’Asturias Semanal, les Fueyes Informatives de Conceyu Bable y apocayá, la Constitución pal Estáu Asturianu fecha polos republicanos federales nel 1883, únicu testu, otramanera y hasta onde yo sé, de carácter ideolóxico-programático del sieglu XIX onde l’asturianu ye consideráu como llingua.

-Fálenos un pocoñín de lo que vamos atopar nesti númberu…

-Los llectores van topar artículos de Faustino Zapico (de la campaña pola autonomía p’Asturies desarrollada polos republicanos federales nel 1897), Cristóbal Ruitiña (de l’apaición d’Asturias Semanal) y d’Armando Magadán (centráu nel Partíu Asturianista); a lo qu’hai qu’añader la presentación del proyectu de tesis del historiador estaunidense Patrick Zimmerman y un piñu de reseñes bibliográfiques.

¿Qué-y prestaría qu’incluyera Erada 3 y nun pudo ser?

-Les collaboraciones d’autores que tienen muncho que dicir nesti tema, casu de Tino Brugos, Sergio Sánchez Collantes, Carlos Gordon, ente más otros.

-Nesti númberu nun hai estaya de documentos, ¿ye un cambiu permanente?

-Foi una cuestión puramente coyuntural y debida namás a que la persona encargada d’esa sección nun taba mínimamente satisfecha y prefirió dexalo pa otra vuelta.

-Y cola entrega nueva estrenen editorial, ¿a qué se debe’l cambiu?

-Nuna publicación d’estes característiques, onde nin el director nin los collaboradores llogren beneficios económicos, sí ye necesario tener l’apoyu activu de la editorial, dalgo que tres de la marcha d’Antón García d’Ediciones Trabe foi a ufrir Suburbia Ediciones, que foi a involucrase nel proyectu con toles consecuencies.

Non menos importante, ye cierto, ye que’l director de la revista refuga intromisiones y defende de manera activa la llibertá d’espresión.

-¿Qué-y paez el diseñu nuevu?

-Ye otru tipu de diseñu, más clásicu si se quier, que ye obra de la editorial y que cumple les espectatives que tenía. Sía que fuere, ye meyor qu’opinen los llectores, tanto’l diseñu como’l conteníu de la revista ye pa ellos, non pa mi.

-¿Cuándo y ónde va presentase la revista?

-La primer presentación va facese’l 16 de setiembre nel Antiguu Institutu de Xixón a les 19:30 hores. Sía que fuere, tamos preparando otres presentaciones n’otros llugares d’Asturies y a toes y caúna d’elles tais invitaos a asistir.

Firma la entrevista Inaciu Galán. Pa lleela completa, calcando equí.

Presentamos “Erada”

Erada. Revista d’Historia Contemporánea d’Asturies yá ye un referente ente les publicaciones especializaes n’Asturies y ye conocida pola calidá y el rigor de los sos collaboradores.

Dirixida pol historiador Rafael Rodríguez Valdés, Erada llega al númberu 3 con nuevu diseñu de la mano de Suburbia Ediciones.

Nel sumariu d’esti númberu 3 inclúinse los artículos “La campaña autonomista de 1897”, de Faustino Zapico; “La reaparición d’Asturies nos entamos d’opinión pública democrática nel tardofranquismu. La salida d’Asturias Semanal“, de Cristóbal Ruitiña; y “El Partíu Asturianista (PAS). Asturianismu y interclasismu como estratexa”, d’Armando Magadán; amás de “Reflexiones sobre nacionalismu y historia viva. Nota d’un proyectu sobre la historia d’un nacionalismu frustráu”, de Patrick Zimmerman.