Varia

Fernando Álvarez-Balbuena García, Ramón d’Andrés Díaz, Xulio Viejo Fernández: Anuariu de la Xunta Asesora de Toponima (2006)

Esti llibru recueye’l llabor de recopilación de la toponimia tradicional y el decretu de la so oficialización, amás d’un estudiu percompletu de les distintes formes y variantes de cada nome de llugar. El volume recueye los trabayos de la Xunta Asesora de Toponimia nel añu 2006, con tola información actualizao referente a los conceyos de Nava, Xixón, La Ribera y Colunga.

Tamañu: 24 x 17 cm.; 270 páxines; ISBN 13: 978-84-7847-559-9; PVP: 18 € (IVA incluyíu)

 Xandru Fernández: Les vides incompletes

Poemariu ganador del Premiu Xuan María Acebal 2008, ye’l regresu pela puerta grande de Xandru Fernández a la poesía.

Les vides incompletes pretende ser un recuentu d’esperiencies significatives, munches d’elles truncaes pola muerte o la edá, al tiempu qu’un catálogu irónicu d’opiniones intempestives. Baxo l’advocación de Pasolini y Auden, la poesía dialoga equí con temes prosaicos, d’a diario (la monarquía, la memoria histórica), ensin perder por ello l’aspiración de perdurar.

Tamañu: 24 x 15 cm.; 64 páxines; ISBN 13: 978-84-935800-8-7; PVP: 9 € (IVA incluyíu)

 

Erada. Revista d’Historia Contemporánea d’Asturies. Númberu 3

Erada yá ye un referente ente les publicaciones especializaes n’Asturies y ye conocida pola calidá y el rigor de los sos collaboradores.

Dirixida pol historiador Rafael Rodríguez Valdés, Erada llega al númberu 3 con nuevu diseñu de la mano de Suburbia Ediciones.

Nel sumariu d’esti númberu 3 inclúinse los artículos “La campaña autonomista de 1897″, de Faustino Zapico; “La reaparición d’Asturies nos entamos d’opinión pública democrática nel tardofranquismu. La salida d’Asturias Semanal“, de Cristóbal Ruitiña; y “El Partíu Asturianista (PAS). Asturianismu y interclasismu como estratexa”, d’Armando Magadán; amás de “Reflexiones sobre nacionalismu y historia viva. Nota d’un proyectu sobre la historia d’un nacionalismu frustráu”, de Patrick Zimmerman.

Ruma Barbero de Diego: Manzajú

Hebo un tiempu nel que n’Asturies nun había más autopista que la Y, el Sporting de Xixón quedaba segundu na lliga, los güelos entamaben a falar del so pasáu y los neños bebíen resfrescos asturianos.
 

Manzajú ye la obra cola que’l conocíu músicu y dibuxante Ruma Barbero algamó’l I Premiu de Cómic Alfonso Iglesias que convoca la Conseyería de Cultura y Turismu del Principáu d’Asturies.

En Manzajú, somos testigos d’un viaxe al pasáu onde’l protagonista remembra’l tiempu nel que deprendió a conocese a sigo mesmu. Un viaxe que percuerre, col sentíu del humor propiu del autor, pasaxes de la infancia de Ruma y, poro, de munchos colos que comparte xeneración y recuerdos.

Marta Mori: La mio voz

La mio voz ye’l poemariu que-y valió a Marta Mori’l Premiu Xuan Mª Acebal na so edición de 2010.

La mio voz afonda nes venes característiques de la poesía de Marta Mori: poesía intimista, d’ellaboración curiada y fondu procuru llingüísticu, onde l’autora posa la mirada sobre l’entornu inmediatu y tamién el llonxanu, enllazando la imaxe suxerente cola reflexón axeitada.

Marta Mori d’Arriba (Xixón, 1965) ye autora tamién de los poemarios Pórticu (2003) y L’alcordanza (2010), amás d’estrenase como narradora nel volume de rellatos Histories familiares (2008).

María Cueto Fernández, Xulio Viejo Fernández: Onde la palabra pousa. D’Asturias a Miranda: crestomatía del asturl.lionés occidental

Onde la palabra pousa. D’Asturias a Miranda: crestomatía del asturl.lionés occidental ye una selección útil y percompleta de testos n’asturllionés occidental realizada y prologada polos investigadores María Cueto y Xulio Viejo.

Nel volume recuéyense testos de la tradición oral d’Asturias, Zamora y Bregancia (Pertual), amás d’una amplia muestra de testos lliterarios y xurídicos dende la Edá Media hasta’l sieglu XX. Una obra de referencia pa llingüistes y estudiosos de la nuesa lliteratura, amás d’una interesante introducción a l’amplitú y la variedá del dominiu llingüísticu asturllionés.

Carlos Suari: Atles de los bolos asturianos

Suburbia Ediciones edita l’Atles de los Bolos Asturianos, un llibru destináu a convertise n’obra de referencia sobre’l deporte asturianu por escelencia. L’investigador Carlos Suari revela equí’l so estensu saber sobre’l tema, frutu d’un esaustivu trabayu de campu nun ámbitu d’estudiu, que, a pesar de lo que pueda paecer, nun taba bien esploráu. El propiu autor nos indica que l’Atles de los Bolos Asturianos nun ye un manual de bolos, ye un estudiu de toles modalidaes de bolos asturianos acompañáu de imáxenes, dibuxos y mapes, que tracen un estudiu seriu y rigurosu d’una de les señes d’identidá de la cultura asturiana.

Tamañu: 21x 30 cm.; 252 páxines; ISBN: 978-84-939514-8-1; PVP: 20 € (IVA incluyíu)

Xandru Fernández: El príncipe derviche

Novela ganadora del XXXII Premiu Xosefa Xovellanos, El príncipe derviche trespórtanos a los años caberos del sieglu XIX y a diversos llugares del mapa del Imperiu Austro-Húngaru, nun contestu de conspiraciones, intrigues polítiques y persecuciones. Otra manera, ye tamién la historia de la bomba qu’acabó con Antonio Udina Burbur, l’últimu falante en mundu de la llingua dálmata.

El príncipe derviche supón el regresu de Xandru Fernández a la narrativa llarga, desque publicara en 2006 La banda sonora del paraísu. Autor d’obres como Los homes de bronce (2001), Les ruines (2004; reeditada por Suburbia Ediciones en 2011) y Entierros de xente famoso (Suburbia Ediciones, 2008), Xandru Fernández yá ganara’l premiu Xosefa Xovellanos n’otres dos ocasiones, en 1993 con El club de los inocentes y en 1999 con El suañu de los páxaros de sable.

Tamañu: 15 x 24 cm.; 108 páxines; ISBN: 978-84-940443-0-4; PVP: 12 € (IVA incluyíu)

Xosé Anxelu Gutiérrez Morán: Un ciertu desorde

Un ciertu desorde ye’l poemariu col que Xosé Anxelu Gutiérrez Morán ganó’l premiu Xuan María Acebal na so edición de 2011.

Poesía de lo cotidiano, pero tamién de la memoria; del paisaxe, pero tamién del paisanaxe; d’oxetos y naturaleces muertes, pero tamién de voces y xestos, Un ciertu desorde mira oblicuo pa les esquives perspectives con que la memoria nos desaveza a lo habitual.

Xosé Anxelu Gutiérrez Morán (Avilés, 1969) ye doctor en Bioloxía y investigador del Institutu Español d’Oceanografía. Ye autor de los poemarios Países (2005; premiu Teodoro Cuesta, ex aequo) y Diversa memoria (2010; premiu Teodoro Cuesta).

Tamañu: 15 x 24 cm.; 80 páxines; ISBN: 978-84-939514-9-8; PVP: 10 € (IVA incluyíu)

Milio Mariño: El xaretón del embeligru

Trece rellatos escritos con ironía, retranca y bon humor, y otres tantes aproximaciones a la vida cotidiana dende l’ángulu más sorprendente.

Con esti llibru, Milio Mariño salta a la paliestra de la nueva narrativa asturiana, si bien lleva décades siendo conocíu como articulista d’opinión en medios como Les Noticies y La Nueva España.

Tamañu: 21 x 13,5 cm.; 150 páxines; ISBN: 978-84-940443-3-5; PVP: 12 € (IVA incluyíu)

 

 

Ruma Barbero: El viaxe a la lluz

VII Premiu Alfonso Iglesias de Cómic

Na década de los cincuenta del sieglu XX, mientres les democracies de mediu mundu entamaben el viaxe de reconstruyise moral y físicamente mirando pa un futuru en paz y llibertá, la dictadura española, fascista y nacional-católica, entraba na so segunda década d’autarquía y aisllamientu, basada nun sistema de castes decimonóniques. Mentanto, nos montes asturianos desendolcábase, quiciabes, la última llucha romántica na Europa continental.
Nuna dómina d’allancamientu social, represión política, adoctrinamientu relixosu, capadura moral y atrasu cultural, cualquier contactu col esterior yera una lluz a la que siguir.
Les vivencies reales de la so familia materna cola guerrilla’l conceyu Ponga, válen-y a Ruma Barbero pa entamar un rellatu de ficción amable y enllenu de lluz dientro de los años más grises de la nuestra historia recién.

Ruma Barbero (Somió, Xixón, 1971). Miembru fundador xunto al músicu y dibuxante Ígor Medio del grupu Felpeyu, ye una pieza fundamental de la música asturiana d’anguaño, na que tamién destaca por colaboraciones con otres formaciones como Los Ciquitrinos o por ser lletrista pa bandes como Tejedor, Blima, Pandereteres de Fitoria y pal proyectu “Aire”. Llicenciáu en Belles Artes pola Universidá de Salamanca, ye’l campu de la ilustración otru de los tarrenos que pisa con soltura y éxitu. Yá en 1996, fundaba xunto con otros compañeros la editorial Cactus Comics. Colaboró con revistes fundamentales como El Llapiceru o Gomeru, asina como con medios de comunicación como Les Noticies, Güei o El Comercio. Cola novela gráfica autobiográfica Manzajú algamaría en 2009 el Premiu Alfonso Iglesias de Cómic. En 2012 vio la lluz un ambiciosu trabayu tituláu La Chelita. El Salvador 1992 col qu’algamaría’l Premiu al Meyor Llibru n’Asturianu de 2012 que concede la Tertulia Malory. En 2013 col sellu Tierra Llibros publicaba Aguantando cachones: una selección de les historietes que fue publicando ente 2011 y 2013 nel so fanzine/dixital del mesmu nome y más tarde Moyando’l culu 2015.

 

144 páxines, 24 x 17 cm.; ISBN 8494547933. Preciu: 20 €
Ana Lamela Rey y Laura Fernández Blanco: La estrella Nigeria y otros cuentos sobre adopción

Esta obra nace de la colaboración entre Suburbia Ediciones, las autoras y Asturadop. El libro consta de una serie de relatos ilustrados, protagonizados por niños adoptados, dichos relatos están inspirados en historias reales de niños y niñas asturianas. Todo nació como una exposición que se hizo papel para celebrar el décimo aniversario de Asturadop.
Las historias elaboradas por la escritora y deliciosamente ilustradas, son fiel reflejo del espíritu que ha guiado la asociación desde sus inicios. La autora se reunió con cada familia para indagar en los recuerdos, preferencias, ilusiones, miedos y sueños de sus hijos e hijas. Con esa información como materia prima, hilvanó para cada uno de ellos un relato sensible y personalizado, desde el cual comprenderse, procurar dar un orden a sus sentimientos y emociones, e ir encontrando ese sentido de la vida que les permita transitar por ella sin centrarse en sí mismos, sino en la familia y la sociedad, una actitud vital de cooperación, compañía y apoyo sobre la cual Asturadop ha sido también un ejemplo y referente. Parafraseando a Bettelheim, podríamos decir que no son historias reales pero no son falsas, al contrario, todas están llenas de verdad, de esa verdad luminosa y cargada de sentido que solo la magia del amor es capaz de construir. En ellas, los niños y niñas se reconocen, se sienten protagonistas, se identifican y, en el futuro, dispondrán de un relato, su relato, que presentar y narrar a sus propias familias. Asimismo, a través de ellas, tenemos la oportunidad de asomarnos a sus mundos y emociones.

74 páginas; 24×17 cm.; ISBN 8494227181. Precio: 15 €