Páxina en blanco ye’l títulu de la colección d’ensayu de Suburbia Ediciones. Un llugar pa les idees y l’análisis críticu.
1. Xosé Mª Rodríguez de Bimeda: El cantu’l gallu
El cantu’l gallu ye’l títulu de la columna d’opinión de Xosé Mª Rodríguez de Bimeda nel diariu asturianu La Nueva España. Esti volume recueye cásique cuatro años de collaboraciones periodístiques y permítenos acompañar al autor nes sos reflexones sobre les nueves tecnoloxíes, la identidá colectiva, la percepción del tiempu y del paisaxe, y les rellaciones personales, too ello dende un peculiar y sorprendente puntu de vista. Prólogu de Carlos Cuellas.
2. Ignaciu Llope: De les coses del mundu (I)
De les coses del mundu, del poeta y ensayista Ignaciu Llope, ye un llibru con historia, una y bones l’autor yá usó d’esi títulu hai más de dos décades pa recoyer los sos artículos sobre cuestiones polítiques y antropolóxiques. Ignaciu Llope siempre pensó que De les coses del mundu yera un proyectu en marcha, y nesta edición recueye non sólo aquellos artículos inaugurales, sinón tamién tolos que, dende la década de 1980 hasta l’actualidá, foi asoleyando en mui diversos medios. La producción ensayística del autor ye tan abondosa que De les coses del mundu va publicase en dos volúmenes. El primeru recueye tolos escritos sobre celtismu y música folk, amás de los ensayos y artículos publicaos sobre’l paisaxe y la historia del conceyu de Cuideiru, llugar de nacencia de Llope.
3. Ignaciu Llope: De les coses del mundu (II)
El segundu volume de la recopilación d’ensayos d’Ignaciu Llope recueye tolos testos rellacionaos con temes políticos, cola cuestión de la Universidá asturiana, la lliteratura, el procesu de normalización llingüística y la identidá d’Asturies, con un apartáu dedicáu especialmente a cuestiones antropolóxiques cincantes a la fastera Navia-Eo.
Suburbia 