Pablo X. Suárez fala de “Yoni y yo” en “El Comercio”

ENTREVISTES  

PABLO X. SUÁREZ ESCRITOR

Nun pretendo que la realidá manque, ofenda o asuste
Pablo X. Suárez espubliza cola editorial Suburbia espubliza’l so segundu llibru, ‘Yoni y yo’

ENRIQUE CARBALLEIRA

 
AUTOR. Pablo X. Suárez, en Uvieu, onde vive, rodeau de grafitis. / MARIO ROJAS

Pablo X. Suárez (Siero, 1981) presenta un volume que recueye histories de corte hiperrealista, centraes na cultura basura postindustrial d’un valle central asturianu. Depués del poemariu ‘Asturiana Beat’, Suárez encara esti primer proyeutu narrativu, a la vez que prepara nueves publicaciones que verán la lluz nos prósimos meses.

–¿Qué carauterístiques destacaría de Yoni, el personaxe central del llibru?

–Más qu’un personaxe, Yoni’tis un tipu, a la manera tradicional del costumismu. Como tal focaliza ambientes y rituales urbanos contemporáneos representativos de les nueves clases populares.

–¿Son histories que tienen una base argumental o ambiental común?

–La primer parte’l llibru, Yoni, sí creo que presenta un universu realista coherente: villa suburbana nel area central asturiana, neños-techno. Na segunda parte, Yo, hai más variedá en cuantes a personaxes y ambientes, anque en xeneral ta tamién mui arreyada a Yoni.

–¿Hai dalgún aspeutu autobiográficu nel llibru?

–Lo qu’hai’tis materia sacada de la observación directa y de la narrativa oral. Ye autobiográfico namás en cuantes que fala del espaciu social, xeográficu y cronolóxicu nel que crecí. Lóxico.

–De xuru que’tis posible atopar dellos Yonis en dalgunes ciudaes asturianes…

–De fechu hai xente que sospecha o ta convencía de que Yoni esiste, o dulda ente dos posibles Yonis distintos, y viénen y pregúntenme. Supongo qu’eso quier dicir que funciona como estándar o patrón de personalidá.

–¿Siéntese más cómodu col cuentu curtiu que con una novela más llarga?

–Ai, nun se dicite’cause nunca escribí una novela llarga. Cuando caiga, que cairá, yá sabré. Como llector si te tengo que dicir que lo que me mola’tis la novela curtia, d’ente 150 y 200 páxines, n’edición de bolsu, tapa blanda.

–¿Qué-y paez cuando se diz d’usté que’tis un autor un poco provocador?

–Nun toi d’alcuerdu. Faigo fundamentalmente realismu. Nun pretendo que la realidá manque, ofenda o asuste. Namás que salga a flote na páxina.

–Tamién trabaya de responsable del Serviciu de Normalización Llingüística de la Comarca de la Sidra. ¿Cuenten con bones ferramientes?

–Los servicios de normalización fain por enanchar l’usu institucional y públicu del asturianu mediante tou tipu de campañes y actuaciones concretes nel nivel local, mui davezu tamién en coordinación colos servicios d’otros conceyos. Estes actuaciones que se vienen realizando dende los servicios sí que dan n’avances en cuantes a la consideración social de la llingua asturiana. Sicasí, educación y medios de comunicación son los dos pegoyos principales del procesu de normalización d’una llingua, y n’Asturies la presencia de la llingua n’estos ámbitos’tis mui insuficiente.

–¿Como autor tá esmolecíu pola falta de marcu oficial pa la llingua asturiana?

–Por supuestu.

–¿Cómo cree qu’ayuda la lliteratura a la normalización del Asturianu?

–Ayuda si se producen obres que puedan atraer al llector mediu asturianu perriba de la llingua na que tean escrites. D’estes creo qu’hai carencia.

–¿Volverá Yoni nel futuru?

–Yoni vive, la llucha sigue. Material nuevu d’él hailu en diariosdeyoni. nireblog.com.

–Y otros proyeutos en cartera…

–Pa esti mes saldrá con Glayíu Editorial Pop Retórika, que recueye poemes en castellán escritos nos últimos años. Otru poemariu n’asturianu va salir a lo llargo del 2011. Un llibru d’estampes lliteraries y una novela curtia con Yoni de prota tan tamién nel horizonte d’espectatives.

Fonte: El Comercio

Advertisements

Dexa un retruque

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s