Nueva novela de Nicolás Bardio

Suburbia Ediciones pon nes llibreríes Cuando ensamen les abeyes, la nueva novela de Nicolás Bardio, que fai’l númberu 2 de la colección quemando cromo.

Cuando ensamen les abeyes ye una novela d’aventures y política-ficción que xuega cola pregunta clásica: “¿qué pasara si…?”. Nesti casu, la acción trescurre nuna modernidá ficticia onde Asturies ye un reinu independiente con colonies n’América. Una d’eses colonies, la islla de Santolaya, entama una guerra pola independencia y nella vense implicaos asturianos de los dos llaos del Atlánticu, espíes, un embaxador francés… y un vieyu poema d’Antón de Marirreguera nel que s’escuende la clave p’atopar una ayalga escondida.

Nicolás Bardio (Uviéu, 1987) ye un de los valores n’alza de la narrativa asturiana más nueva. Ye autor d’otra novela (Sol reló, 2008) y collaborador de medios como Les Noticies y Atlántica XXII.

 

Mountain’s Silent Tour

Presentación de “La cueva de la diosa”

“Despidida” en Parque Principado

Top 10 2011

Ye tiempu de llistes. Presentamos a continuación los diez llibros más vendíos a lo llargo de 2011 dientro del catálogu de Suburbia Ediciones:

1. Ruma Barbero, Manzajú

2. Pablo X. Suárez, El sistema débeme una chocolatina

3. Cristina Menéndez Martín, Pallabres sin dicir

4. Adolfo Camilo Díaz, Añada pa un güeyu muertu

5. Xurde Fernández, Intentu d’escritura

6. Marta Mori, La mio voz

7. Contadores de lluz

8. Xurde Fernández y Marián García, L’árbol de la verdá

9. Pablo Antón Marín Estrada, Despidida

10. Ignaciu Llope, De les coses del mundu I

El top 10 de Suburbia Ediciones de ventes acumulaes queda asina:

1. Asturies cuenta… (…Y naide nun escucha)

2. Ruma Barbero, Manzajú

3. Xulio Arbesú, Les siete novies del rei

4. Xandru Fernández, Entierros de xente famoso

5. Ignaciu Llope, El combate melancólicu

6. Xurde Fernández, La espera

7. Iris Díaz Trancho, Mio ma, la pirata

8. Pablo Rodríguez Medina, Perreríes

9. Vía de serviciu

10. Pablo X. Suárez, Yoni y yo

[Nesta rellación nun s'inclúin publicaciones periódiques como Erada nin publicaciones rellacionaes con fundaciones o con instituciones públiques como l'Archivu de la Música d'Asturies o la Xunta Asesora de Toponimia.]

Quemando cromo

Quemando cromo ye’l títulu d’un rellatu de William Gibson y, a partir d’agora, tamién ye’l nome de la nueva colección de narrativa de Suburbia Ediciones. Un llugar pa la ficción onde va afayase l’aficionáu a la novela histórica, la ciencia ficción, el thriller y, en definitiva, lo que vien llamándose “novela de xéneru”.

Abrimos la colección con La cueva de la diosa, d’Arturo Somoano, una novela ambientada nel sieglu VIII y onde la trama xira alredor de Pelayu y les sos rellaciones colos clanes astures en víspores de la invasión musulmana.

13

El númberu 13 de la colección mecánica popular de Suburbia Ediciones ye Aeropuertu, de Xurde Fernández y Marián García.

Aeropuertu ye una novela sobre histories cruciaes alredor de dos viaxeros a los qu’intercambien les maletes accidentalmente nun aeropuertu. A partir d’esti fechu aparentemente ensin importancia, los autores desarrollen dos histories en paralelo hasta llegar a un sorprendente y conxuntu final.

Los autores: Xurde Fernández (Candás, 1975) ye filólogu y profesor de llingua asturiana, amás d’escritor y estudiosu de la cultura asturiana. Autor de Volver, La espera, Intentu d’escritura, tien llograo premios lliterarios como’l Llorienzu Novo Mier nel añu 2008 con Díes d’iviernu. Marián García (Xixón, 1975) ye filóloga y Esperta en Llingua Asturiana pola Universidá d’Uviéu. Anguaño ye profesora de Llingua Asturiana en Xixón. Dambos los dos, amás de collaborar na novela El color del escaezu y nel llibru infantil L’árbol de la verdá (Suburbia Ediciones), foron finalistes nel premiu Asturnews de lliteratura infantil con Febreru 29, y son autores del manual A la gueta del material espardío. Llingua asturiana y lliteratura (Conseyería d’Educación y Ciencia, 2008).

12

El númberu 12 de la colección mecánica popular de Suburbia Ediciones ye Teoría de la pertenencia, de Ramón Lluís Bande.

Teoría de la pertenencia ta integráu por una colección de proses autónomes que mui probablemente -queda a xuiciu del llector- conformen, con una serie d’enllaces visibles y otros invisibles, una narración unitaria: la d’un personaxe ensin nome en plena tresformación, que sigue buscando les característiques principales que puedan definir la so identidá nel momentu presente.

Un llibru que foi escribiéndose con voluntá de llibru, pero con una renuncia explícita a l’arquitectura habitual de les narraciones. Teoría de la pertenencia ye una colección de textos escritos nel actu y con fecha d’entrega, que se negaron a una reescritura y desarrollu posterior, alcontrando nes sos imperfecciones, nel so abandonu, la entidá d’obra acabada.

El llibru tien un protagonista, un yo -mui cercanu al narrador- que s’escuende tres múltiples nomes en diferentes momentos de la historia y en diferentes llugares del mundu pa poder acercase a entender el so presente. Un xuegu que descubre les múltiples voces necesaries pa poder intentar desarrollar una voz personal, a la vez qu’intenta construir y integrase nuna determinada tradición cultural o creativa na que se citen escritores, cineastes, pintores, músicos…

Continuando’l camín narrativu empezáu pol autor en llibros anteriores, Teoría de la pertenencia tien muncho de diariu personal, de crónica d’actualidá (social y íntima), de recuentu de llectures. En fin, una formulación nueva de les preguntes vieyes: ¿quién soi? ¿quién soi en relación a lo que somos?

Ramón Lluís Bande (Xixón, 1972) ta consideráu como una de les voces más personales de la lliteratura asturiana. Escritor y cineasta, ente los sos títulos destaquen noveles como Les habitaciones vacies (2009), llibros infantiles como Historia d’un árbol (2010) o películes como Estratexa, El fulgor o Sangre. Anguaño dirixe na televisión pública asturiana, TPA, la revista audiovisual de cultura, Pieces, y la serie documental, Camín.

11

La colección mecánica popular de Suburbia Ediciones llega al so númberu 11 con Les ruines,de Xandru Fernández, un títulu clave na lliteratura asturiana de los últimos tiempos.
Les ruines ye la historia d’una familia y al mesmu tiempu ye la historia d’una época y un llugar que yá formen parte del pasáu. Una historia qu’empieza nos años de la guerra civil y acaba nos díes del fundimientu del Prestige, pero resumida nos sucesos d’un solu día de febreru de 1980.
Publicada per primer vez en 2004 por Ediciones Trabe, esta novela mereció’l Premiu de la Crítica de l’Asociación d’Escritores Asturianos y foi recientemente seleccionada polos llectores de Biblioastur como una de les diez grandes obres de la lliteratura asturiana del últimu mediu sieglu.
Esta nueva edición, revisada y prologada pol autor, permítenos acceder de nuevu a un llibru que yera imposible d’atopar nes llibreríes dende hai años.
“Un retratu despiadáu del paisaxe humanu y material que s’esborria al empar qu’un modu de vida pa dexar namás escombriu” (Pablo Antón Marín Estrada).

Xandru Fernández (Turón, 1970), profesor de filosofía y traductor, ye autor de más d’una docena de títulos publicaos en llingua asturiana a lo llargo de venti años, entre ellos les noveles El suañu de los páxaros de sable (Premiu Xosefa Xovellanos, 1999), Les ruines (Premiu de la Crítica d’Asturies, 2004), La banda sonora del paraísu (Premiu Trabe, 2006), y los poemarios Servidume (2001) y Les vides incompletes (Premiu Xuan María Acebal, 2009). La so última obra narrativa hasta la fecha ye’l volume de cuentos Entierros de xente famoso (Suburbia Ediciones, 2008). Ta acabante apaecer una antoloxía billingüe de la so poesía, titulada Restauración (2010).

Pa lo pequeño de la casa

Na colección de lliteratura infantil Camín de Bree, Suburbia Ediciones añede esta selmana un nuevu títulu: Nel circu lusu, un llibru pa los más pequeños, de la mano de la escritoria Llucía Tejerina y l’ilustrador Marcos Vigo.

Nel circu lusu ye la primer aventura (pero de xuru que non la última) protagonizada por Sira, una neña perinquieta, sorriyona ya imaxinativa. Un llibru orientáu a primeros llectores.