Dalguna vez nos tenemos quexao del carácter previsible de la edición n’asturianu, que nos entrega cada añu una collecha interesante, perriba de los cien títulos, onde cásique siempre sabemos d’antemano lo que vamos alcontrar: premios lliterarios, llibros infantiles, mui poques traducciones y la producción lliteraria d’unos cuantos nomes que van alternando d’un añu pa otru. Nun toi falando del conteníos, maraviosos siempre a priori, o d’obres bones o males, que les hai, sinón de llibros que ruempan la monotonía mediática y pongan el focu sobre una lliteratura necesitada d’escaparates, de que se fale d’ella. Hai tiempu que nengún editor nos sorprende con una obra que sutruma, anque seya un poco namás, los cimientos d’esti edificiu cultural, tal vez con una antoloxía polémica, con un llibru impensable sobre cosmoloxía o quién sabe con qué ocurrencia. Teoría de la pertenencia, de Ramón Lluís Bande (Xixón, 1972), nun ye nin muncho menos un llibru polémicu, pero sí una novedá sorprendente nesti parorama pola so intertextualidá.

Na mayor parte de los 54 textos breves que componen la entrega, Bande dedícase a escenificar el momentu nel que mui distintos creadores escribieron determinaes frases coles que’l «Narrador», el protagonista del llibru, s’identifica. Digamos, entós, que’l camín que lleva a componer esta obra tuvo qu’andase en dos direcciones. Primero, nuna llectura de les fontes, d’onde Bande sacó de contextu les frases o versos que-y prestaben, coles que s’identificaba. Una y bones fechu esi llabor, hubo que volver sobre los pasos y imaxinar (o documentar, que de too habría) el momentu nel que l’autor clásicu escribía o pensaba aquelles palabres, y munches veces la intención o la razón de la escritura. De xemes en cuando quien s’amuesa directamente en dalgún capítulu ye’l pensamientu del «Narrador», qu’asoma ensin que lu arropen otros nomes pa facer recuentu intimista de les sos esmoliciones y certeces. Sicasí, anque nel llibru pareza que se ta falando de Brecht o de Pasolini, de Kurosawa o de Dylan, de Duras o de Marilyn Monroe, ente munchos más, Bande quier, nesti viaxe pela memoria colectiva en busca del llugar onde posar, al que pertenecer, sentise retratáu nes palabres de los maestros que lu axudaron a ponese en camín y a ser parte d’esi espaciu cultural y emocional.

Nacíos como colaboración pa la prensa periódica con un formatu yá dau, hai unos pocos capítulos que parecíen necesitar un mayor desarrollu a la hora d’integrase en llibru pa llograr l’equilibriu del conxuntu. En Teoría de la pertenencia, el Narrador va dexando dalguna pista biográfica que permite identificalu col autor, pero nun fairía falta. Basta atender pa los ámbitos y los autores de los que provienen les cites, la lliteratura, el cine y la música (tamién la pintura, pero menos representada) pa reconocer ensiguida l’autorretratu personal y culturalista de Ramón Lluís Bande, escritu a munches manes cola técnica del colaxe.

Fonte: La Nueva España, 9-2-2012

Cuando ensamen les abeyes ye una novela d’aventures y política-ficción que xuega cola pregunta clásica: “¿qué pasara si…?”. Nesti casu, la acción trescurre nuna modernidá ficticia onde Asturies ye un reinu independiente con colonies n’América. Una d’eses colonies, la islla de Santolaya, entama una guerra pola independencia y nella vense implicaos asturianos de los dos llaos del Atlánticu, espíes, un embaxador francés… y un vieyu poema d’Antón de Marirreguera nel que s’escuende la clave p’atopar una ayalga escondida.

Nicolás Bardio (Uviéu, 1987) ye un de los valores n’alza de la narrativa asturiana más nueva. Ye autor d’otra novela (Sol reló, 2008) y collaborador de medios como Les Noticies y Atlántica XXII.

1. Ruma Barbero, Manzajú

2. Pablo X. Suárez, El sistema débeme una chocolatina

3. Cristina Menéndez Martín, Pallabres sin dicir

4. Adolfo Camilo Díaz, Añada pa un güeyu muertu

5. Xurde Fernández, Intentu d’escritura

6. Marta Mori, La mio voz

7. Contadores de lluz

8. Xurde Fernández y Marián García, L’árbol de la verdá

9. Pablo Antón Marín Estrada, Despidida

10. Ignaciu Llope, De les coses del mundu I

El top 10 de Suburbia Ediciones de ventes acumulaes queda asina:

1. Asturies cuenta… (…Y naide nun escucha)

2. Ruma Barbero, Manzajú

3. Xulio Arbesú, Les siete novies del rei

4. Xandru Fernández, Entierros de xente famoso

5. Ignaciu Llope, El combate melancólicu

6. Xurde Fernández, La espera

7. Iris Díaz Trancho, Mio ma, la pirata

8. Pablo Rodríguez Medina, Perreríes

9. Vía de serviciu

10. Pablo X. Suárez, Yoni y yo

[Nesta rellación nun s'inclúin publicaciones periódiques como Erada nin publicaciones rellacionaes con fundaciones o con instituciones públiques como l'Archivu de la Música d'Asturies o la Xunta Asesora de Toponimia.]

Quemando cromo

Abrimos la colección con La cueva de la diosa, d’Arturo Somoano, una novela ambientada nel sieglu VIII y onde la trama xira alredor de Pelayu y les sos rellaciones colos clanes astures en víspores de la invasión musulmana.

Aeropuertu ye una novela sobre histories cruciaes alredor de dos viaxeros a los qu’intercambien les maletes accidentalmente nun aeropuertu. A partir d’esti fechu aparentemente ensin importancia, los autores desarrollen dos histories en paralelo hasta llegar a un sorprendente y conxuntu final.

Los autores: Xurde Fernández (Candás, 1975) ye filólogu y profesor de llingua asturiana, amás d’escritor y estudiosu de la cultura asturiana. Autor de Volver, La espera, Intentu d’escritura, tien llograo premios lliterarios como’l Llorienzu Novo Mier nel añu 2008 con Díes d’iviernu. Marián García (Xixón, 1975) ye filóloga y Esperta en Llingua Asturiana pola Universidá d’Uviéu. Anguaño ye profesora de Llingua Asturiana en Xixón. Dambos los dos, amás de collaborar na novela El color del escaezu y nel llibru infantil L’árbol de la verdá (Suburbia Ediciones), foron finalistes nel premiu Asturnews de lliteratura infantil con Febreru 29, y son autores del manual A la gueta del material espardío. Llingua asturiana y lliteratura (Conseyería d’Educación y Ciencia, 2008).

Teoría de la pertenencia ta integráu por una colección de proses autónomes que mui probablemente -queda a xuiciu del llector- conformen, con una serie d’enllaces visibles y otros invisibles, una narración unitaria: la d’un personaxe ensin nome en plena tresformación, que sigue buscando les característiques principales que puedan definir la so identidá nel momentu presente.

Un llibru que foi escribiéndose con voluntá de llibru, pero con una renuncia explícita a l’arquitectura habitual de les narraciones. Teoría de la pertenencia ye una colección de textos escritos nel actu y con fecha d’entrega, que se negaron a una reescritura y desarrollu posterior, alcontrando nes sos imperfecciones, nel so abandonu, la entidá d’obra acabada.

El llibru tien un protagonista, un yo -mui cercanu al narrador- que s’escuende tres múltiples nomes en diferentes momentos de la historia y en diferentes llugares del mundu pa poder acercase a entender el so presente. Un xuegu que descubre les múltiples voces necesaries pa poder intentar desarrollar una voz personal, a la vez qu’intenta construir y integrase nuna determinada tradición cultural o creativa na que se citen escritores, cineastes, pintores, músicos…

Continuando’l camín narrativu empezáu pol autor en llibros anteriores, Teoría de la pertenencia tien muncho de diariu personal, de crónica d’actualidá (social y íntima), de recuentu de llectures. En fin, una formulación nueva de les preguntes vieyes: ¿quién soi? ¿quién soi en relación a lo que somos?

Ramón Lluís Bande (Xixón, 1972) ta consideráu como una de les voces más personales de la lliteratura asturiana. Escritor y cineasta, ente los sos títulos destaquen noveles como Les habitaciones vacies (2009), llibros infantiles como Historia d’un árbol (2010) o películes como Estratexa, El fulgor o Sangre. Anguaño dirixe na televisión pública asturiana, TPA, la revista audiovisual de cultura, Pieces, y la serie documental, Camín.

Xandru Fernández (Turón, 1970), profesor de filosofía y traductor, ye autor de más d’una docena de títulos publicaos en llingua asturiana a lo llargo de venti años, entre ellos les noveles El suañu de los páxaros de sable (Premiu Xosefa Xovellanos, 1999), Les ruines (Premiu de la Crítica d’Asturies, 2004), La banda sonora del paraísu (Premiu Trabe, 2006), y los poemarios Servidume (2001) y Les vides incompletes (Premiu Xuan María Acebal, 2009). La so última obra narrativa hasta la fecha ye’l volume de cuentos Entierros de xente famoso (Suburbia Ediciones, 2008). Ta acabante apaecer una antoloxía billingüe de la so poesía, titulada Restauración (2010).