males tierres ye la colección de poesía de Suburbia Ediciones. Un catálogu que crez día a día, lo mesmo que les ambiciones de la poesía más nueva. Cada llibru cuenta con una ilustración de cubierta acordies col tonu y la inspiración del poemariu, ilustración que se muestra na portada y se repite, invertida, na contraportada. A mou de xuegu inofensivu, los títulos impares y los títulos pares de la colección representen dos llinies diferentes, lo que se percibe en pequeños matices del diseñu. El títulu de la colección ye un homenaxe a la película de Terrence Malick Badlands (1973).
1. Ignaciu Llope: El combate melancólicu
El combate melancólicu ye l’esperáu llibru de poemes d’Ignaciu Llope dempués de diez años de silenciu editorial.
Comprometíu ya irreverente, Ignaciu Llope esplora en El combate melancólicu los mitos y les zunes, los suaños y les frustraciones de toa una xeneración. Nos sos versos, herederos cuando de la poesía vanguardista d’entreguerres, cuando de la llírica tradicional del Arcu Atlánticu, pero recorríos por una personalidá inconfundible, danse cita figures y fechos hestóricos (Andreu Nin, Ulrike Meinhof, la revolución irlandesa…) coles esperiencies privaes, glayaes en público, d’un militante de lo contemporáneo.
Ignaciu Llope (Cuideiru, 1961) ye poeta y ensayista y una de les voces más reconocíes del Surdimientu lliterariu asturianu. Esti ye’l so tercer llibru de poemes, dempués de Xeografía del augua (1992) y El llugar del sol (2000).
2. Carlos Suari: Orbayu d’alfileres
Desprexuiciada y directa, la poesía de Carlos Suari cala nos misterios de la cotidianidá a la busca d’un sentíu fragmentariu de la existencia: el parte meteorolóxicu, el mobiliariu urbanu o les rimes radiaes de la cultura pop, valen-y al autor, ente munchos otros signos, de puntu de partida pa trazar una cartografía de los desamparos y los afanes del ser humanu modernu.
Orbayu d’alfileres culmina y clausura’l ciclu poéticu que l’autor entamó en Treslallende, escritu xunto col tamién poeta Berto García.
Carlos Suari (Avilés 1982) ye tamién l’autor del primer poemariu asturianu en Copyleft, El mio cachu tírolu.
3. Arturo Álvarez Fernández “Tangueiro”: Volta de paso
Volta de paso ye’l primer llibru d’Arturo Álvarez Fernández, más conocíu pol alcuñu de “Tangueiro”, y tamién ye’l primer títulu n’eonaviego que publica Suburbia Ediciones. Prólogu de José Antonio Fernández Vior.
La poesía d’Arturo Álvarez Fernández bebe de la querencia pola tierra, pero tamién de la esperiencia de les derrotes y les victories que marquen toa biografía emocional.
4. Iván Cuevas: cácabos d’adoquín
Estrena poética del autor xixonés Iván Cuevas, cácabos d’adoquín ye poesía urbano, reflexón a pie de cai sobre’l poder de la poesía, sobre les lluches y los enfotos nos que’l poema s’implica y sobre les zunes y los ídolos de barru llevantaos pola sociedá post-industrial. En cierta midida, cácabos d’adoquín tien muncho de recapitulación sobre’l valor de cada pallabra nel nuevu mileniu.
En pallabres del historiador Rafael Rodríguez Valdés, autor del prólogu del llibru, lo guapo d’esta obra ye “cómo l’autor recupera los axentes colectivos como materia poético; agora que yá nun se respira’l fumu de les manifestaciones, presta afayase ente pallabres onde vive y se tresmite’l sentir de lo colectivo al encruz d’una voz personal que contién y sostién la fuerza de les que nun se dieron”.
5. Pablo X. Suárez: El sistema débeme una chocolatina
Con esti títulu firma Pablo X. Suárez el so tercer poemariu (el segundu n’asturianu, depués d’Asturiana Beat). Afonda con él nel particular estilu desenfadáu (y n’ocasiones tamién enfadáu) que gasta tamién en narrativa (véase la colección de cuentos Yoni y yo, tamién publicada por Suburbia Ediciones). Munchos de los poemes equí recoyíos yá son habituales nos recitales o timbes poétiques organizaes pel autor estos últimos dos años. Una muestra d’inxeniu, iconoclastia y fuerza espresiva que nun-y va cayer embaxo al llector atentu.
6. Pablo Antón Marín Estrada: Despidida
Llargamente esperáu polos sos llectores fieles, Despidida ye’l nuevu poemariu de Pablo Antón Marín Estrada. Un llibru desoláu y desolador, obra de madurez d’un autor que sigue siendo una de les más firmes razones poles que la lliteratura asturiana merez l’atención del públicu más atentu.
Pablo Antón Marín Estrada (Sama, Llangréu, 1966) ye una de les voces indispensables del Surdimientu lliterariu asturianu. De la so llarga y obligada trayectoria puen citase obres como Esa lluz que naide nun mata, La ciudá encarnada, Nubes negres, Díes d’inocencia, Animal estrañu o Los caminos ensin fin.
La semeya de la portada ye obra del fotógrafu Roberto Pato.
7. Cristina Menéndez Martín: Pallabres sin dicir
Cristina Menéndez Martín (Mieres, 1984) ye una voz nueva na poesía asturiana. Pallabres sin dicir, el so primer llibru, descúbrenos a una autora con un mundu complexu que s’afilvana al traviés de pallabres cencielles.
En pallabres del escritor y académicu de la llingua Roberto González-Quevedo nel epílogu a esta obra, “Pallabres sin dicir abre un nuevu camín. Toi seguru de qu’esti camín pasará por munchos otros volúmenes y poemes, afondando asina’l llabor estéticu de les nueves voces de la poesía asturiana, que necesita, que sigue necesitando, almes nueves”.
