Una obra fundamental sobre’l deporte asturianu

Suburbia Ediciones edita l’Atles de los Bolos Asturianos, un llibru destináu a convertise n’obra de referencia sobre’l deporte asturianu por escelencia. L’investigador Carlos Suari revela equí’l so estensu saber sobre’l tema, frutu d’un esaustivu trabayu de campu nun ámbitu d’estudiu, que, a pesar de lo que pueda paecer, nun taba bien esploráu. El propiu autor nos indica que l’Atles de los Bolos Asturianos nun ye un manual de bolos, ye un estudiu de toles modalidaes de bolos asturianos acompañáu de imáxenes, dibuxos y mapes, que tracen un estudiu seriu y rigurosu d’una de les señes d’identidá de la cultura asturiana.

 

Tamañu: 21x 30 cm.
252 páxines
ISBN: 978-84-939514-8-1
Preciu: 20€ (IVA incluyíu)

Carlos Suari, Premiu de la Crítica d’Asturies

El poeta Carlos Suari vien de recibir el Premiu de la Crítica d’Asturies na modalidá de poesía en llingua asturiana pol so llibru Orbayu d’alfileres, editáu por Suburbia Ediciones.

Dende equí la norabona por un premiu más que merecíu.

Restolando IV: José Luis Piquero fala del llibru de Carlos Suari “Orbayu d’alfileres”

El críticu y poeta José Luis Piquero escribe en Les Noticies sobre’l poemariu de Carlos Suari Orbayu d’alfileres (5 de xunu de 2009).

DANDO GUERRA

Carlos Suari (Avilés, 1982) dióse a conocer como poeta d’una manera poco avezada (que quiciabes lo seya más d’equí a unos años): con un llibru n’internet. A esa obra de títulu quiciabes poco afortunáu, El mio cachu tírolu (2005), siguió Treslallende (2007), que recoyía un poemariu de Suari (Cualesquier ciudá ye un ermu) y otru de Berto García (Nel andén del iviernu), cola tema común de la emigración y l’esiliu. Suari axunta agora en Orbayu de alfileres los poemes posteriores a esi trabayu, xunto con dalgunos d’El mio cachu tírolu, nuna suerte de visión de conxuntu y recapitulación de tola so obra; lo que’l propiu autor llama na nota inicial “una tira d’exercicios de busca poética”.
Marcadamente “anti-poética”, la poesía de Suari parte de lo cotidiano y de la realidá más inmediata pa llevantar una voz de protesta, sarcástica y virulenta, contra’l mundu del consumismu y les verdaes pactaes. Per estes páxines circulen dalgunos de los iconos más conspicuos de la cultura popular: el MacDonald’s y Bill Gates, Madonna y El Corte Inglés, los reality-shows o l’Ibex 35. Nos testos cuélense cantares, comentarios sentíos pela cai, mensaxes publicitarios y versos ayenos. Tienen estos poemes, dacuando, muncho de grafitti, de consigna anti-sistema garabatiada con priesa en cualquier paré. Pero nun falten recursos como la rima (“Añada”) o’l haiku (lloñe del tonu avezáu del haiku tradicional).
Los poemes de Suari dan la impresión, a veces, de quedar no anecdótico, nel puru inxeniu o nel puru exabruptu. Una poesía na que too cabe pue caer na banalidá y nel tópicu. Nesti sen, quiciabes una poda meyoraba’l llibru, que suena dalgo repetitivu. Pero cuando acierta, acierta, como en “Trataos de llercia”, “Insomniu” o “Hestoria en baby talk”. Otros, como “El típicu versu sobre un váter cualquiera”, queden n’humoraes más o menos fates.
Irreverente y provocador, Carlos Suari va dexando salir, poco a poco, una voz personal. Igual habrá abandonar dalgunos tics deprendíos nel realismu puerco más vistu (la heterodoxa pue llegar a ser tan conformista y canónica como la ortodoxa más pura) pero si l’instintu llector nun nos falla (y pensamos que non), hai equí un poeta que tien tovía muncha guerra que dar.

Fonte: Les Noticies. Publicaciones Ámbitu S.L. 5 de Xunu de 2009- AÑU XIII-Númberu 639