Una esperada reedición
Avientu 19, 2010
En 1985, Adolfo Camilo Díaz ganaba’l premiu Xosefa Xovellanos de novela con Añada pa un güeyu muertu, un thriller crepuscular que diba marcar a toa una xeneración de narradores asturianos.
La novela, editada daquella pol Principáu d’Asturies, tuvo un interesante recorríu de crítica y públicu, y convirtió al so autor (que volvería ganar el mesmu premiu n’otres trés ocasiones) nun referente ineludible de la lliteratura asturiana contemporánea. La llingua asturiana certificaba, asina, que yera apta pa representar cualaquier trama o sentimientu. D’entós p’acá, la influencia d’Añada pa un güeyu muertu, reconocida les más de les veces (anque silenciada otres), ye fácil de ver na evolución de les nueses lletres.
Suburbia Ediciones rellanza esta novela inaugural nuna edición onde’l propiu autor revisó’l testu pa espurgalu d’hiperasturianismos y espresiones usaes na llingua lliteraria d’aquel periodu pero estrañes pal llector actual. Una nueva oportunidá d’asomase a unes páxines históriques pa la nuesa lliteratura.
La edición complétase con un epílogu esplicativu del autor y un prólogu de Xandru Fernández.
